Få hjelp av nokon som bryr seg!

Ove Sørestrand

Husdyr har alltid vore mi store interesse. Eg var tidleg med i fjøset på morsgarden på Skor i Hyllestad. Tida med handmjølking, som framleis var fleire plassar på 1960-talet, hugsar eg godt.

Medan mor mjølka var dyra gode leikekameratar, og fleire gonger med ei brødskive i handa og kortreist mjølk, vart frukosten teken. Den tida var også utmarka ein viktig ressurs, og turane etter kyr til mjølking og tilsyn med sauene, var nok med på at ein seinare i livet har hatt stor interesse og glede av fjellturar med tilsyn av dyr, jakt og fiske.

Seinare tok foreldra mine over garden Sørestrand på Lavikdal i Høyanger. Etter ein bustadbrann i 1974 vart det bygd bustadhus, nytt fjøs og dyrking av nytt areal.

Eg gjekk på Mo Jordbruksskule, og starta etter dette som avløysar i bygdene heime. No er det bror min med familie som har garden, og dei har bygd nytt lausdriftsfjøs til mjølkekyr. Landbruksrådgiving har vore mitt arbeid gjennom 36 år, med lengste tida i TINE. Eg var ein periode innom Nortura, og no seinare år NLR Vest.

Det har vore mange spennande oppgåver opp gjennom åra, men ei av dei største var nok sanering av geitebuskapane, som no er fri fleire sjukdommar. Dette gjorde at vi no har ei geit med god helse, svært god mjølkekvalitet og mange gode produkt.

Som vanleg er hausten ei travel tid, og helgane har stort sett gått med til kåring av verlam på ulike stader i Sogn og Fjordane. Dette har eg vore med på sidan 1980-talet. Eg har alltid vore interessert i avlsarbeid, og det er viktig å bruke moglegheitene som ligg i å velje avlsdyr med eigenskapar som ein ynskjer å forbetre i eigen buskap.

Fôrbestilling frå fjøsen, fôrkvalitet, prognose for rett slåttetid, avlingsregistrering, tiltak for å nå oppsette mål… Alt dette er omgrep som blir brukt overfor deg som bonde. Felles for alt er at vi som rådgjevarar vil hjelpe deg til å drive garden din best mogleg agronomisk, klimavenleg og økonomisk.

Det er om våren og om sommaren vi legg grunnlaget for grovfôrmengda og -kvaliteten. Det må setjast inn rette tiltak for å få best mogleg resultat i fjøsen! Du som medlem i NLR Vest kan når som helst melde deg på, og såleis tinge gardsbesøk hjå oss. Vi kallar det NLRpluss Grovfôr. Besøk på garden er viktig for å sjå på eng og areal, og dette vil gje det beste grunnlaget for planlegging av tiltak! Ein ting er ein telefon til oss omkring eit problem, men ofte er det viktig å sjå og diskutere problemstillinga på staden. Rådgjevinga vår blir betre på denne måten.

Rådgjevinga vert tilpassa behovet du har på din gard. Om du berre treng litt, litt meir eller mykje rådgjeving gjennom sesongen i år, så er NLRpluss Grovfôr ei hjelp til deg for å auke avlinga og betre kvaliteten på grovfôret ditt. Dette vil sjølvsagt også bidra positivt på økonomien i drifta di. Du vel sjølv kva vi skal ha fokus på, og i kor stort omfang du ynskjer bidrag frå NLR Vest.

Innhaldet i NLRpluss Grovfôr skal tilpassast den enkelte deltakar. Her er nokre aktuelle punkt:

Vurdering av gras og jord på ulike skifte – prioritering av tiltak
Gjennomgang og evaluering etter sesongen, framlegg til endringar

Uttak av fôrprøver – framlegg til endringar, NLR Surfortolken
Val av såfrø i gjenlegg, reparasjonssåing
Plantevern, plan for bekjemping av ugras i attlegg og i eng/beite

Grovfôrøkonomi, vurdering av små og store investeringar, eige utstyr kontra leige; til dømes eige eller leige presse, investere i rake- og vendeutstyr, transportkostnadar, rundball/silo m.m. Vi kan òg ta ein full gjennomgang av grovfôrkostnadane på bruket ditt og sjå kva moglegheiter du har for effektivisering.
Rådgjeving omkring kjøp og bruk av presisjonsutstyr

Vi har ein del medlemar som har tinga NLRpluss Grovfôr, men vi tek i mot fleire!

Rapport etter besøk tysdag 07.06.22

Her finn du eit døme på ein enkel rapport etter eit NLRpluss-besøk:

Medlemane i Alva Samdrift møtte opp. Først eit kort møte i fjøsen, så synfaring:

I det store og heile ser det bra ut. Ei problemstilling no er om det skal haustast noko før regnet kjem, evt. seint fredag eller laurdag. Vi såg ikkje aks på noko anna enn rapp. Fjorårsenga med stort innslag av bladgras ser svært bra ut. Denne saman med den eldre enga innafor denne (isådd eittårig raigras) er det som bør haustast først her i dalen. Her er det tenkt 3 slåttar.

Konklusjon: Det er for tidleg å slå her dei første dagane. Framleis eit stort avlingspotensiale å hente. Det er å håpe at det meldte regnet ikkje gjer for mykje av seg, og at det går fort over. Det kan vere aktuelt å starte slåtten om nokre dagar dersom vermeldinga endrar seg, dvs. at regnet blir skubba ut i tid.

Vi tok turen til Fosnes og Sandvikja. Her er litt ny eng, men det meste er eldre eng. Sidan det er meldt godt ver dei første dagane, så er det berre å setje i gang med slåtten her i dag. Få slege og pakka alt før det kjem regn. (Er rett nok meldt ettermiddagsbyer, så litt spennande er det).

I Sandvikja skal det brakkast til hausten. Her er mykje breiblada ugras som byhøymole, løvetann og hundekjeks, dvs. det trengst anten sterk dose med Roundup (0,8 l) eller blanding av Roundup (0,5 l) og t.d. Duplosan Super (ca. 0,4 l). Bruk helst det siste alternativet.